Joxemi Zumalabe Fundazioa herri-mugimenduetatik, herri-mugimenduekin eta herri-mugimenduentzat lan egiten duen eragilea da. Sortu zenetik izan da bere helburu nagusia Euskal Herrian bestelako jendarteeredu baten alde lanean ari diren herri-mugimenduak laguntzea. Eguneroko langai ditugu formakuntza, gogoeta eta dinamizazioa; eta, honako honetan, formakuntza-ildoan aurrera eraman genuen proiektu bati buruz ariko gatzaizkizue, Bor-Bor(K) Herri Jakintzen Laborategiaren baitan antolatutako Pil-Pilean ikastaroaz.Jakintza kolektiboki sortzea ardatz, Euskal Herriko herri-mugimenduek elkar ezagutzeko, esperientziak trukatzeko eta saretzeko espazio izan zedin sortu zen 2015. urtean Pil-Pilean ikastaroa (hasieran Bor-Bor(K) deitu genuena). Formakuntza politiko integrala sustatu nahi genuen: historikoa, teoriko-ideologikoa, metodologikoa, gorputzezkoa, antolaketakoa…; herri-sektoreek pairatzen dituzten zapalkuntza guztiak eta aurrera daramatzaten borroka eta erresistentzia estrategia denak aitortuz. Formakuntza politikorako esperimentu harekin kultura politiko askatzaileagoak pentsatu nahi genituen, gure kultura politikoak izateko eta ekiteko dituen moduak berritzeko ahaleginean sakondu.Amets, ilusio eta gogo horietatik abiatu ginen, eta guk irudikatzen genuen bidean inspirazio iturri izan zitezkeen esperientziak eta pertsonak ezagutzen joan ginen, Euskal Herrikoak eta Hego Ameriketakoak; lokalak eta internazionalak. Esperientzia horietatik behar genituen osagaiak gure egin, eta zentzu askotan berritzailea izan den formazio politikorako ikastaroari ekitea lortu genuen. Ekin eta egin, ikasturte bateko iraupeneko ikastaroaren 3 edizio egin baikenituen.

plus-circle Add Review

comment

Reviews